تعرف على كلية العلوم قسم الكيمياء التي تمهد الطريق أمامك لتصبح صيدلي! بلسان أحد طلابها..

اول شي اذا دخلت الفرع عن رغبة رح تحبوا من اول سنة واذا دخلتو لانو هيك طلعلك بالمفاضلة كمان رح تحبو.. بيجوز ياخد معك وقت شوي لتتعمق فيه اكتر يعني للسنة التانية بس بالأخير رح تحبوا اكيييد 

الكيميا اربع سنين
سنة عن سنة بتتعمق بالفرع اكتر وبيزيدوا موادك اكتر
بالسنة التالتة بتختص..
الاختصاصات هنن تطبيقية وبحتة
وحيوية موجود بس بحلب

طلبوا السنة الماضية بالمفاضلة العامة عالمجموع 209.4
واذا تخصصي 19.4 علامة الكيميا

موازي.. مجموع 203.7
وتخصصي 19.1 علامة الكيميا

مستقبلها :
اختصاص الكيميا البحتة بيتوظف عند الدولة بمجال التدريس او بتدرّس بالمعاهد وفيك تشتغل بالمعامل 

التطبيقية.. صناعات بمختلف مجالاتا من معامل اغذية وادوية ومواد تنظيف وبيقدر يشتغل بمجال التدريس... كلشي مواد بحياتنا عبارة عن كيميا لهيك طالب الكيميا هو الأساس بكل الشركات والمعامل 

اختصاص الحيوية أحلى وأصعب
بيدرس فيه العمليات الحيوية بجسم الانسان وعلم الوراثة وكل التفاعلات الخاصة بالكائن الحي وجسم الانسان
وبيشتغل بعد التخرج بمختبرات التحاليل الطبية بالإضافة لمجالات عمل الكيمياء التطبيقية والتدريس (بيشتغل فيهن كلن) لأنو اوسع واشمل 

بدمشق متأملين يصير عنا هاد الاختصاص لأنو زارنا الوزير هالسنة وحكا انو عم يدرسوا القصة ورح تصير ان شاء الله بس مامنعرف ايمتا وبأي سنة 

بالنسبة لمواد السنة الأولى 12 مادة كل فصل 6 مواد بالاضافة لمادتين عملي كل فصل 

مواد العملي هنن فيزيا وكيميا بالفصلين
العملي عليه 30 علامة و 70 للنظري( بسس لهدول المادتين فيزيا وكيميا)
باقي مواد النظري علاماتن من 100

بس تفوت عالمخبر رح تعششق الفرع اكتر خصوصي لما تبلش تشتغل بايدك

بالنسبة لمواد النظري بالفصل الاول عنا..
الكيمياء العامة 1 - فيزياء عامة 1 - رياضيات 1و2 - عربي - انكليزي
_______________________
مواد الفصل التاني..
كيمياء عامة 2 - فيزياء عامة 2 - رياضيات 3 و4 - ثقافة - انكليزي

وبالسنة التانية والتالتة والرابعة بزيدوا المواد

اهمم شيي الحضوور للمواد الاساسية ويلي بتحس حالك فيها مو كتير منيح 

الفرع بيجنن وكتير طلاب عم يتوافدوا عليه.. لاتردووا ع يلي بقلكن الكيميا صعبة وبس فتا مابتتخرح منها كلووو حكي فاضي.. اول شي ماافي فرع سهل وفرع صعب كلوو بدو شغل وتعب وأي فرع دخلتوه بس تعطوه اهتمامكن وتدرسوا بتلاقو سهل وبتتخرجوا 

حضروا كلشي من اول يوم لتتعرفوا عالدكاترة وعالمواد

نقطة أخيرة ..
كتار الطلاب يلي عم يسألوا اذا فيهن يكملوا بعد التخرج صيدلة ولا بس الاوائل... كلللللل يلي تخرجوا كيميا بيحقلن يكملوا على حسابن بجامعة خاصة صيدلة بيعدلولن الشهادة يعني الموااد وبيكملو للتخرج.. بحطوهن سنة تانية او تالتة حسب الجامعة 
وبصير اسمك صيدلي كيميائي

تنويه: تم كتابة المقال باللغة العامية وليس الفصحى, لأنه نقلاً عن كتابة أحد طلاب الكلية وليتم فهمه وشرحه بهذه الطريقة بشكل أكبر.